100-sonli maktabda bolalar va o‘smirlar o‘rtasida moliyaviy savodxonlikni rivojlantirishga bag‘ishlangan uchrashuv bo‘lib o‘tdi. Tadbirning maqsadi — zamonaviy raqamli xizmatlar va bank mahsulotlari hatto eng yosh avlod uchun ham tushunarli va foydali bo‘lishini ko‘rsatishdir.
Tadbir ishtirokchilari Bolajon va Yoshlar kartalari, shuningdek, aynan bolalar va ularning ota-onalari uchun yaratilgan Uzcard Kids kartasi imkoniyatlari bilan tanishdilar. Mutaxassislar bunday yechimlar bolalarga pulni boshqarishni o‘rganishga, xarajatlarni nazorat qilishga va moliyaviy mustaqillikka ilk qadam qo‘yishga qanday yordam berishini tushuntirdilar.
Alohida blok moliyaviy savodxonlik asoslari va raqamli muhitda xavfsizlik masalalariga bag‘ishlandi. O‘quvchilarga ma’lumotlarini qanday himoya qilish, kiberfiribgarlik urinishlarini tanish va onlayn xizmatlardan mas’uliyat bilan foydalanish yo‘llari haqida so‘zlab berildi.
O‘z tajribalari bilan UZCARD mahsulotlari bo‘yicha mutaxassislar — Sunnat Ibrohimov va Izzat Abdurashitov, Aloqabank vakillari hamda uchrashuv tashabbuskori — produkt menejer G‘iyosjon Aliyev o‘rtoqlashdilar.
Bunday tashabbuslar o‘quvchilarda moliyaviy mablag‘lardan foydalanishning asosiy ko‘nikmalarini shakllantiradi, raqamli madaniyatni oshiradi va yangi texnologiyalar hamda imkoniyatlar dunyosida o‘zini ishonch bilan his qiladigan avlodni tarbiyalash yo‘lidagi birinchi qadamlardan biriga aylanadi. UZCARDning bunday loyihalarni qo‘llab-quvvatlashi kompaniya strategiyasini — moliyaviy savodxonlikni rivojlantirish va har bir kishi uchun qulay raqamli yechimlarni joriy etishni — yana bir bor tasdiqlaydi.